تجربتي لأزالة شعر جسمي بالليزر مهم جدا

عيادات اوباجي (( جده , حي الحمراء مقابل مستشفى الوالده ))

سويت عندهم جلسه الليزر للمناطق الحساسه كامله بـ 1000 ريال وعلى حسب علمي البكيني بـ 700
عموما جلسه الليزر بقولكم كيف في البدايه قبل الدخول

1 – يعطونك بنج ( كريم ) مااتوقع انو بنج بس بيخفف الالم شويا

2 – لمن تدخل/ي الغرفه يعطونك محلول مويا > قالت السستر انو معقم عشان يروح الكريم حق البنج ويشتغلوا على البشرة

3 – بالنسبه لـ وظيفة الليزر بتكون كالتالي > يحدد الدكتور/ة كم ضربه اشعه مثلا كل 5 مرات يرجع يحدد الضربات >
ولمن يبداء وظيفته الليزر بعد تحديد كم ضربه ليزر بتكون كالتالي وظيفة الليزر
يحرق الشعره من الخارج والداخل وعند حرقها من الداخل تحس/ي بلسعه لانو الشعره من الداخل انحرقت
ملاحظة :: لمن كنت اقول فوق ^ يحدد الدكتور/ة الضربة حق الليزر ما اقصد ضربه زي كف او شي زي كذا هههههه
لا اقصد ضربات كانك مشغله فلاش وتطفيه وتشغليه زي كذا ضربات شعاعيه

4 – بعد الانتهاء برضوا بيعطونك كريم تسوي منه وتخليه مده ساعه بالكثير وتشيليه

5 – نسيت اقولكم انو قبل مايبداء الدكتور/ة ضربات الليزر بيحط ثلح مكان ضربه الليزر وقد مايطول بوضع الثلج مكان المنطقة قد ما انتي ماتحسي بالليزر

6 – الشي المهم الي نسيت اقوله قبل كل شي فيه بعض الناس الدكتور/ة يقول تعال بدون ماتشيل شعرك عشان يحدد نوع الجهاز المناسب وبعد التحديد يقول الدكتور/ة تعال المره الجايه وخفف شعرك للدرجة الفلانيه او يقول شيل شعرك بالموس
على حسب يعني روحوا بدون ماتشيلوا شعر جسمكم …

7 – قبل الجلسة كان شعر جسمي سميك + اسود لكن حاليا انا سويت الجلسة الاولى بـ جهاز اسمه جنتل وعدت على الجلسه 6 ايام والدكتور قالي تعالي بعد 14 يوم ( اسبوعين ) سوي جلسه الرتوش
( بقولكم بعد شويا يعني ايش رتوش )
المهم عدت 6 ايام والشعر ماراح بس يتساقط بشكل قليل و يومي واذا جيت اسحب الشعر بيدي يطيح
جلسه الرتوش هيا جلسه كمراجعه العمل السابق وتكون مجانيه الجلسه لكل المستشفيات والعيادات الي تسوي ليزر
المهم الجلسة حق الرتوش فائدتها اذا الدكتور/ة سوا مناطق وماركز وسوا مناطق اخرى فـ جلسه الرتوش كمراجعه
عشان يتم انتهاء الجلسة بشكل كامل

8 – حبيت اقولكم انو بعد الجلسة الاولى لحد الان ( 6 ايام من اول جلسه ) لمن احك المكان الي سوا الدكتور/ة فيها ليزر
بتسير المنطقه حمرة ( بشرتي بيضة ) فـ المفروض ما اسوي كذا الدكتور/ة قالي لمن اتروش بالليفه امررها المكان
الي سويت فيه الليزر وبيتساقط الشعر حبه حبه …

(((( حبيت اقولكم تجربتي انشاءالله تكونوا استفدتوا ولا تخافوا من الليزر ترا كذاب إلي يقول فيه اضرار الوالده دكتورة وقالت لي مافيه اي اضرار ))))